١٠ أولويات في تربية العيال.. أحسنلك تتعلمهم لو إنت أب أو أم أو إنسان 😊
عيني وقعت على حوار لمدة دقيقة بين ولد (عمره حوالي ٧ سنين) وأب في سن الطحن.. الولد بيكلم أبوه فحاجة والأب بيرد عليه بطريقة توجع القلب! .. نظرات الأب ناحيته نظرات سريعة وتايهه، من غير إهتمام بل ومصحوبة بتكشيم وكلضمه كأنه قرفان يبص ناحية الولد.
طبعاً حكمي الشخصي على الموقف ده غير محايد لأني ماعرفش ظروف الأب في اليوم ده إيه، وكده! صح؟ .. بس في كل الأحوال انا حاقول فكرتي برضه و take it or leave it 😊.. السبب في البوست ده هو إني حتى لو مش عارف ظروف الأب، فأنا عارف كويس الأثر اللي ممكن يسيبه إستمرار الوضع ده على الابن!
جدير بالذكر إن أنا أب طبيعي، عايش في العصر ده ومطحون زي باقي الناس، وباقع ساعات في كل انواع الاخطاء! وعندي في نفس الوقت أمل إني أصلح، وباعترف اني عندي إختيار إني أبقى أحسن.
بإختصار أولادنا بيتعلموا كتير من إسلوب حياتنا معاهم.. محتاجين نربيهم على مبادئ أهم لحياتهم بكتير من اللي بيتعلموه بالصدفة، وبما إننا عادةً بنتعلم من اللي بنجربه مش من اللي بنسمعه، فا محتاجين نعمل ده بطريقة عملية عشان التنظير والنصح المجرد أثبت قصوره على مر العصور..
طب نعمل ايه؟
دي بعض الافكار اللي ممكن نبدأ نعملها من النهاردة:
١- علمهم الاحترام: أما حد من اولادك يكلمك اتبع الخطوات التالية:
- بُص ناحيته
- ركز معاه و اسمعه من غير مقاطعة
- وبعدين رد عليه بتفهم وتقدير لمشاعرة
.. عشان يتعلم الاحترام في الحديث ويعرف من جواه إنه كائن محترم فيتعامل على الاساس ده.. على فكرة مهما كان كلامه مش مهم أوي بالنسبالك فهو ممكن يكون مهم جداً بالنسباله..
الإنسان اللي حاسس انه مالهوش قيمة، إنسان خطر عالناس حواليه! و إنت أول واحد حتحاسب عالمشاريب.
٢- علمهم الحب: لما حد من أولادك يقولك تعالى نلعب جرب مره ترمي أي حاجة في إيدك ٥ دقايق وتقوله ياللا نلعب وتقوم فعلاً معاه (المشاركة من أهم أدلّة الحب عند الأطفال)..جرب كمان تقوله إنك بتحبه وتحضنه وتبوسه من غير سبب معين..
مافيش حاجة تستاهل الصيانة والاهتمام قد قوة علاقتك بأولادك!
في يوم من الايام الصعبة، كل اللي حينفعك وينفعهم، إن شاء الله، هي العلاقة دي بس!
٣- علمهم الثقة وإتخاذ القرار: خليهم يختاروا وياخدوا قرارات على قدهم في حياتهم اليومية، يتحكموا في مصروفهم ولبسهم ووقتهم ومذاكرتهم وحاجتهم .. لما تعوزهم يعملوا حاجة، حاول بدل التعليمات تديهم اختيارات ، وخليهم يتحملوا مسئولية النتايج.. شيل إيدك بقى، على قد ما تقدر من الطريقة اللي بيوصلوا بيها للنتايج..
حتى لو ده حيحقق في الأول نتايج أقل جودة أو أبطأ، إستحمل شوية معلش الدنيا مش حتطير.. نمو شخصيتهم على المدى الطويل أهم بكتير من نتايج أعمالهم على المدي القصير، ومن أهم عناصر نمو الشخصية إنهم ميخافوش يغلطوا عشان ميخافوش يتعلموا
٤- علمهم البساطة والتواضع و الكرم: إشركهم معاك في التطوع والتبرع ومساعدة الناس وأعمال الخير، وعلمهم يعملوا ده بتواضع، خليهم يروحوا للناس ويتكلموا معاهم .. لما تكون حتدي حاجة لحد ما تندهلوش عشان يجيلك، نزِّل إبنك أو بنتك يديها بإيده وعلمه يقعد عند مستواه ما يديهاش من فوق!
خطأ شائع: (معظمنا بيعلم الاولاد التواضع على إنه فضل مننا على الناس، فبيطلع التواضع شكل من بره، مشحون بالغرور من جوه .. علمهم إن التواضع حق وعدل مش فضل، وإنهم في الحقيقة مش أفضل من حد إلا بنعم وستر ربنا عليهم
..الإنسان المتكبر جاهل ومسكين
٥- علمهم الصبر والايجابية وسعة الحيلة: لما يكون فيه عندهم مشكلة خليهم هم يحاولوا يحلوها بس في نفس الوقت حسسهم إنك معاهم وفاهم إحساسهم .. وفّر لهم مساحة آمنه و حنينة عشان يحسوا و يُحبَطوا ويعيطوا ويعانوا ويتعلموا يلاقوا حلول.. اسألهم في الوقت ده عن أحلامهم وأهدافهم ونفسهم في إيه، وخطتهم لتخطي العقبات، و إيه نقط القوة اللي في حياتهم اللي ممكن يستعملوها في ده.. اسأل اكتر ما تجاوب.
٦- علمهم إنهم مسئولين عن حياتهم و تجربتهم: لما ينجحوا في حاجة أو يوصلوا لحاجة إمدح مجهودهم وإصرارهم وتخطيطهم وطريقتهم في إدارة الأمور، أكتر ما بتمدح ذكائهم وجمالهم وطعامتهم 🙂 عشان يعرفوا قيمة المسئولية الكاملة وبذل الجهد بدل ما يعتمدوا على اللي لقوه عندهم من غير مجهود..
العقلية اللي بترتقي بالحياة هي العقلية اللي مستعدة دايما تتعلم وتكبر
٧- علمهم القراءة: عشان اللي ما بيقراش وما بيتعلمش دماغه بتشتغله وبتمرجحه طول حياته.. وده تحدي مش سهل بس يستاهل.. وهما صغيرين اقرا معاهم، ولما يكبروا اقرا انت قدامهم.. يمكن ده يأثر أسرع
٨- علمهم الجدعنه والشهامة: خليهم يساعدوا الجيران، ويعملوا خير في السر من غير ماحد يعرف (ينضفوا حاجة لحد، يشيلوا حاجة من حد معدي، يعدّوا حد الطريق، يشاركوا الناس أفراحهم وأحزانهم.. ) ده أضمن طريق انهم يلاقوا لحياتهم معنى
٩- علمهم ياخدو الأمور ببساطة: إوعى تكون من الناس اللي فاكرة إن التربية معناها إنك تبقى جد دايما.. دي اسمها أڤورة! إعمل جرعة يومية من الهزار والضحك مهما كانت الظروف، ولما حد من ولادك يقع، جرب تسيبه يقوم يقف بعد الوقعه لوحده ما تقومش تشيله، وأما يقوم ويجيلك احضن وبوس و طبطب وهزّر (بس ما تضربش الأرض و الكرسي وما تشتمش الحيطة) .. بلاش هطل و ظُلم لمخلوقات ملهاش ذنب 😁
١٠- علمهم الإيمان:
- الصلاة في وقتها أهم من أي حاجة وكل حاجة
- الحمدلله أول كلمة باقولها لما بتجيلي نعمة
- أول نعمة في يومي إني صحيت الصبح، فنبدأ يومنا بالحمد..
- أخر نعمة في يومي إني أنام شبعان وفي آمان، فننهي يومنا بالحمد
- الدعاء و التوكل من أهم أسباب التوفيق لو عايز أحقق حاجة..
- حُسن معاملة الناس بتسهّل الحياة..
الثقة بالنفس والسيطرة وقوة الشخصية وقوة العقل واللياقة؛ كللللل دول لوحدهم حيطان مايلة، لو من غير إيمان.. عكاكيز من قش لو سندتك شوية مش حتسندك دايماً.. اللي معندوش إيمان بيبقى فاضي من جواه، ممكن أي حد يلاقي فيه مكان مناسب لإلقاء فضلاته
أخيراً ((وأهم من كل اللي ده)) .. أكّلهم من حلال و ماتبطلش تدعيلهم.
خلي البوست ده بقى في مكان سهل تشوفه..ابدأ بفكرة واحدة عالاقل النهاردة (و انا كمان حابدأ معاك).. و شير مع الناس اللي نفسهم يتطمنوا على ولادهم.
طاقتنا كلها ضايعة في محاولة تظبيط الحياة للعيال.. تعالوا نغيَّر شوية و نجرب نظبط العيال للحياة!
😊 نهاركم سعيد
أشرف هلال
